Halloween-i dhe Fëmijët e Shkollës Shqipe ne Filadelfia

Festimi i Halluinit (Halloween-it) është i zakonshëm në Amerikë. Është një festë e caktuar për ditën e fundit të muajut tetor të çdo viti. Në këtë festë fëmijët vishen me kostume dhe maska për të larguar të këqinjtë, shtrigat, kafshët, djallin, etj, etj., dhe hanë karamele e çokollata, në përgjithësi ëmbëlsira.

Kjo ditë është festuar në shkollën shqipe “Gjuha jonë” në Filadelfia qysh në vitet e para të krijimit të shkollës. Kështu ndodhi edhe në këtë 31 tetor që përkonte në ditën e dielë, ditë kur zhvillohet mësimi shqip. Fëmijët erdhën në shkollë të veshur me kostumet dhe maskat karakteristike të kësaj dite. Takoheshin me njëri – tjetrin e u gëzoheshin kostumeve të tyre por edhe të bashkëmoshatarëve. Ja Sara e vogël ka veshur një kostum të zi me shirita rozë kurse në kokë ka një kapele si të shtrigave, Angelina me një fustan të gjatë me ngjyrë të verdhë, Vesa me një fustan të gjatë me ngjyra të zeza dhe jeshile dhe kapele me majë të gjatë, Angela me një kostum djallushe në ngjyrë të kuqe dhe me brirë në kokë, Kevin i veshur si kowboys, Xhesida me një fustan të gjatë me ngjyrat e kuqe dhe të zezë, etj. etj.

Llazar Verua si gjithmonë mjaft i përkujdesur ndaj fëmijëve, bleu disa lloje karamelesh. Këtyre iu shtuan edhe patatinat, lëngjet e frutave por edhe karamelet dhe çokollatat që kishin sjellë Angela, si dhe mësuesja e vitit të dytë Nikoleta Papa. Mbi tavolinë u bë një shumëllojshmëri ëmbëlsirash.

Sapo mbaroi ora e parë e mësimit fëmijët lanë klasat dhe u grumbulluan në klubin e shoqatës. mernin nëpër pjata apo edhe nëpër duar ëmbëlsirat dhe uleshin nëpër tavolina. Gëzonin të gjithë. Llazari dhe Shkëlqimi, një prind fëmije, interesoheshin që fëmijëve t’u plotësoheshin të gjitha dëshirat.

Një atmosferë shumë e bukur u krijua kur midis fëmijëve u organizua konkursi se kush do ta kete kostumin më të “bukur”, më karakteristik për këtë festë.

Në fillim u krijua komisioni i vlerësimit të kostumeve me fëmijë që kishin ardhur pa kostume Halluini, pra që nuk kishin të drejtë të konkuronin. Pastaj fëmijët kaluan një e nga një para komisionit dhe prindërve që ishin të pranishëm. Kushdo që kalonte në “paradë” duartrokitej. Dhe fëmijët mundoheshin që të paraqiteshin në mënyrë sa më dinjitoze. Në fund komisioni u tërhoq për të përcaktuar fituesit. Nuk e kishin të lehtë një gjë të tillë mbasi kostumet ishin me të vërtetë shumë të “bukur”. Më së fundi u shpall vendimi, për djemtë Arlind Shehu kurse për vajzat Xhesida Pajollari. Shpallja e fituesve u shoqërua me duartrokitje të forta nga të gjithë fëmijët.

Me urimin “Gëzuar Halluinin” fëmijët u drejtuan nëpër klasa për të vazhduar minutat e ngelura nga ora e dytë e mësimit.
Me aparatin fotografik u munduam që të fiksonim gjithçka. Megjithëse ishte jo e lehtë të fotografonim çdo moment të kësaj feste, një pjesë të mirë të të gjitha çasteve në këtë festë e fiksuam në celuloidë që do i bashkangjiten këtij materiali.

Në fund edhe një foto me fëmijët është një kujtim i bukur i kësaj dite, kurse Llazari deshte të kishte një kujtim me “grupin e tij të vjetër”

Filadelfia, 31 Tetor 2010